การเกิดขึ้นของจิตตามภูมิ
ตึสภูมิสุ จิตฺตานิ กติ ชายนฺติ เม วท
จุทฺทเสว ตุ จิตฺตานิ โหนฺติ สพฺพาสุ ภูมิสุ.

สทา วีสติ จิตฺตานิ กาเมเยว ภเว สิยุํ
ปญฺจ รูปภเวเยว จตฺตาเรว อรูปิสุ.

กามรูปภเวเสฺวว อฏฺฐารส ภวนฺติ หิ
เทฺวจตฺตาลีส จิตฺตานิ โหนฺติ ตีสุ ภเวสุปิ

ฐเปตวา ปน สพฺพาสํ จตสฺโสปายภูมิโย
เตรเสว จ จิตฺตานิ โหนฺติ ฉพฺพีสฺภูมิสุ.

อปรานิ จตสฺโสปิ ฐเปตฺวารุปฺปภูมิโย
จิตฺตานิ ปน ชายนฺติ ฉ จ ฉพฺพีสภูมิสุ.

สุทฺธาวาสิกเทวานํ ฐเปตฺวา ปญฺจ ภูมิโย
ปญฺจ จิตฺตานิ ชายนฺเต ปญฺจวีสติภูมิสุ.

อปรานิ ทุเว โหนฺติ ปญฺจวีสติภูมิสุ
ฐเปตวา เนวสญฺญญฺจ จตสฺโสปายภูมิโย

เทฺวปิ จิตฺตานิ ชายนฺติ จตุวีสติภูมิสุ
อากิญฺญํ เนวสญฺญญฺจ ฐเปตฺวาปายภูมิโย

อปายภูมิโย หิตฺวา ติสฺโส อารุปฺปภูมิโย
เทฺวเยว ปน จิตฺตานิ โหนฺติ เตวีสภูมิสุ.

อรูเป จ อปาเย จ ฐเปตฺวา อฏฺฐ ภูมิโย
เอกาทสวิธํ จิตฺตํ โหนฺติ ทฺวาวิสภูมิสุ.

สุทฺธาวาเส อปาย จ ฐเปตฺวา นว ภูมิโย
เอกวีสาสุ นิจฺจมฺปิ จตฺตาโรว ภวนฺติ หิ.

เอกํ สตฺตรสเสฺวว จิตฺตํ ชายติ ภูมิสุ
สุทฺธาวาเส ฐเปตฺวา ตุ อปายารุปฺปภูมิโย.

ทฺวาทเสว ตุ ชายนฺเต เอกาทสสุ ภูมิสุ
ฐเปตฺวา ปน สพฺพาปิ ภูมิโย หิ มหคฺคตา.

กามาวจรเทวานํ มนุสฺสานํ วเสน ตุ
อฏฐ จิตฺตานิ ชายนฺเต สทา สตฺตสุ ภูมิสุ

ปญฺจมฌานปาเกโก ชายเต ฉสุ ภูมิสุ
จตฺตาริ ปน จิตฺตานิ ตืสุ ตีเสฺวว ภูมิสุ.